周嘉洛個頭夠大 有得撼!

藝人劉丹與周嘉洛昨日在鰂魚涌出席樂齡科技活動,對於有指獲無綫力捧成為「千禧五虎」之一,嘉洛說:「未聽過,自己會腳踏實地去做,唔會諗力唔力捧,我係貓仔嚟啫,唔係虎,做好自己崗位先。(千禧五虎對撼MIRROR?)咁犀利?聽到都一額汗。(做得好同姜濤有得揮?)唔係啩?冇可能!」劉丹就力撐「乖孫」太睇小自己,嘉洛說:「咁又冇,但係做人唔可以咁囂張,要內斂啲,人哋欣賞就多謝畀面,自己講就無謂喇。」劉丹戲言:「你可以撼o架!你個頭夠大。」嘉洛笑說:「公公講得好,唯一可以對撼就係個頭!」