郭富城盡父責變補習天王

《第45屆香港國際電影節》前晚於尖沙咀文化中心舉行開幕禮，電影節大使郭富城與揭幕電影《七人樂隊》導演許鞍華、洪金寶、演員龔慈恩和女兒林愷鈴等亮相。提到城城近期頻頻與太太方媛及女兒親子樂「放閃」，他說：「工作延遲咗，有時間一定帶佢哋出去，希望陪住小朋友成長，呢個係作為父親嘅責任。（幫手教小朋友做功課？）暫時啲功課唔係好複雜，升上一年班就會壓力大啲。」

讚廖啟智專業

對於他與梁朝偉演出的電影原本安排在電影節播出，但被指因題材敏感而抽起，他說：「完全唔關事，據我所知係因為技術上調整趕唔切，呢套係商業電影。」對於廖啟智離世，與他合作無間的城城感可惜，他說：「最深印象係合作《無雙》，開工佢攞咗自己畫嘅素描嚟問我畫得靚唔靚，好欣賞佢對角色深入嘅揣摩、投入，對佢好欣賞、尊敬。」

林愷鈴食得唔好嘥

而龔慈恩與林愷鈴分別演出《七》片的單元， 龔慈恩踢爆女兒被大家取笑鍾意食道具魚，林愷鈴笑言：「嗰陣第2次拍戲，仲好懵懂，諗住食得唔好嘥。」至於許鞍華執導的單元《校長》，由吳鎮宇與馬賽主演，她說：「我哋抽籤每人負責拍一個年代，我拍50年代，拍攝內容亦冇限制。」