袁詠儀嫌老公阻發達

近年主打內地市場的袁詠儀(靚靚),昨日罕有為無綫新綜藝節目擔任嘉賓。事隔10年再踏足無綫,靚靚不排除之後與無綫再合作,不過堅拒夫妻檔,皆因嫌老公張智霖阻她發達!

由余安安、羅敏莊及陳凱琳主持的無綫新綜藝節目《日日媽媽聲》,首集嘉賓有靚靚、張慧儀及鄧兆尊等,無綫首席創意官王祖藍更特意探班支持。靚靚受訪時表示是相隔10年再踏足無綫,問她是否掛住返內地參加真人騷搵真銀?她坦言:「唔關錢事,主要係冇咩特別吸引我,但呢個節目好正,應該要做多啲呢啲題材嘅節目。」問到被誰打動「出山」?她笑說:「係志偉落命令,祖藍執行……(咁多人先叫得郁你?)唔係,係代表有好多原因想嚟。同羅敏莊好耐冇見,又想見吓師妹(陳凱琳),一齊分享媽媽經。」

恨開工吃喝玩樂

靚靚不排除之後再與無綫合作,又表示已向監製表達了很多想法:「啱我嘅都可以玩,千祈唔好係啲好正經嘅節目,最想拍啲關於吃喝玩樂。」問到會否與老公張智霖夫妻檔亮相?她即耍手擰頭,秒回:「暫時唔好住啦!我哋喺內地嘅合作都少咗,始終我係個靚女,想要自己嘅事業,唔好互相阻住對方發達!(想搵多啲錢買包包?)唔係,搵食艱難呀!」續言如果有適合的戲劇題材,亦會考慮:「演戲係我最鍾意嘅工作,但始終年紀大,如果拍攝時間唔長、體力同狀態應付到嘅都可以。」

張慧儀准囝囝入行

此外,張慧儀偕兒子Hanson一同受訪,透露母子檔拍攝外景片段,取笑兒子面對鏡頭時動作生硬,但好處是令他了解自己的工作性質。問到Hanson是否想參加更多幕前工作?他腼腆笑說:「都好。」問會否讓囝囝入行?張慧儀表示:「如果真係有興趣,做媽媽嘅又點會介意。」至於鄧兆尊玩到由頭濕到落腳,他透露節目中主要做「開心果」角色,面對一眾女主持及嘉賓有問必答,更抵死說︰「一個阿伯有啲咩吖?你哋都知有咩對手。」