陳家樂被「老婆仔」洩蜜 狼狽滅聲

陳家樂及衛詩雅（Michelle）主演的英皇電影《不日成婚》前晚舉行首映禮，亦是將軍澳康城英皇戲院的開幕典禮，片中演員朱栢康、談善言、楊偲泳及岑珈其齊齊大晒冷，更獲英皇集團老闆楊受成伉儷、吳浩康（Deep）、曾樂彤、許靖韻及萬希泉創辦人沈慧林等現身支持，當中Deep疑為避談日前孖郭思琳同遊南丫島「宿一宵」兼變第三者一事而婉拒受訪。對於電影受疫情影響，由賀歲檔延至復活節檔期，兩位主角都表示不失望，因適逢戲院入座率放寛至7成半，4月1日上映的《不》片正好成為首部受惠電影：「到時唔放假喪謝票，希望票房有好成績！」

被嫌老餅好傷心

Michelle又帶同有份客串的5歲姪女瑆瑆，孖家樂一齊受訪，男方自爆已向瑆瑆求婚，得戚笑說：「佢係我老婆仔！」Michelle爆姪女之所以答應客串亦全因「老公」：「佢知道有家樂先拍，但其實冇對手戲，所以佢都好失望！」但她笑指隨着姪女長大，對家樂的愛亦減少：「佢最近嫌家樂老！其實佢有新對象，就係佢嘅同學仔。」家樂即扮慘話有少少傷心。記者笑問他有「老婆仔」，不怕女友連詩雅呷醋？他瞬間面紅想扯開話題。記者轉問瑆瑆可知「老公」有女友？她童言無忌表示知道，又點頭示意見過面，即被Michelle掩嘴，場面爆笑！

問Michelle會否再搵姪女拍戲，她說：「雖然佢好鍾意拍戲，但麻麻哋想佢入行，怕佢變得老積，童真好寶貴，到佢大個先畀佢自己揀行咩路。」最後記者再追問瑆瑆覺得連詩雅靚唔靚？今次嚇得家樂出手掩嘴，Michelle則急急抱她走，3人落荒而逃！

此外，曾樂彤透露剛拍完電影《金手指》，勁Hyper表示可以跟影帝梁朝偉做對手戲非常幸運：「真係好緊張，係咁提醒自己唔可以NG，好彩最後都冇。」又笑言不敢正視偉仔的電眼，每次見面打完招呼就行開，連集郵都沒勇氣。