孫慧雪勝在爛做 大「疫」不倒

藝人孫慧雪近年既拍劇又當主持、歌手及網紅,曾被朋友揶揄「爛做」,力勸她建立鮮明形象,沒料疫情突襲,她一個輕鬆轉身就變陣在網上搵食,收入絲毫沒影響,惟龐大工作量令一家人相處時間減少,3歲多的兒子因不捨媽媽返工而爆喊,令阿雪相當心痛。

忙於拍攝無綫節目《姊妹淘》的孫慧雪,早前客串處境劇《愛.回家之開心速遞》,飾演任性富家女,由於從未演過該類角色,當日接到劇本時非常興奮,不諱言僅參與一集未夠喉,期望監製給予機會,安排多些戲份。

心痛少時間湊仔

早前阿雪開網店賣雜貨、護膚品及零食等,她表示利潤雖然不高,但認為可幫助小店,所以不介意,更說:「之前成日開直播,又喺唔同網上平台做嘉賓,雖然係疫情,但真係好彩冇影響收入。啲人話我爛做、唔夠專,分辨唔到我邊瓣,但當疫情嚟到時,我慶幸當初冇專到,幕前冇工作就跳入網絡搵錢。」由於忙得不可開交,照顧家庭的時間相對減少,結果囝囝以行動「投訴」,她說:「有一次出門口返工,佢發現之後眼淚流晒出嚟,搞到我都好心痛,即刻上前攬住佢,冇計,依家香港地好多父母都係咁,惟有犧牲見朋友時間。(同老公分配時間?)佢好好,會接我收工爭取時間見面,盡量喺車程入面傾,因為喺屋企個仔會爭住黐我。」

計劃開甜品網店

另外,談到《姊》除了介紹潮流,阿雪與吳紫韻還有個煮甜品環節,她說:「成日要搵呢方面嘅資料,跟住喺甜品個基礎上再加創意,平時有匿喺屋企練習,本身呢方面唔叻,只限蛋糕同朱古力,依家識整鳥結糖,所以我哋構思一齊開網店,或者喺市集開住先。(分工合作?)係,我哋一日要整好多個甜品,佢喺韓國學整花藝蛋糕,我都有跟佢學。」更指每日在甜品催谷下不自覺增磅,所以同時間努力戒食澱粉質,確保不會變大肥婆:「其實我由123磅減到依家114磅,只係上鏡比其他主持肥,因為佢哋全部都好瘦,好在監製好好,每次安排我坐喺枱入面嘅位置,等我冇咁顯肥。」