莫家淦 DIY紙皮汽車氹細路
藝人莫家淦製作小手工素有心得，近日就在社交網分享自製的「紙皮汽車」，家中2個小朋友玩得不亦樂乎，快樂果然無價。他受訪時說：「嗰日細佬訂嘅奶粉送咗嚟，阿哥話要留番紙皮箱，後來發現佢喺度搞嚟搞去，話想整架車，咁我咪幫佢囉！」父子同心合力，只用了2小時就大功告成。
家淦指紙皮車相當耐用，小朋友一直將新玩具推來推去，仍未玩厭，他自豪地說：「我係畫畫、學素描嘅人，平時佢哋想畫啲乜都搵我幫手。不過哥哥嘅功課我會由佢自由發揮，唔會好似一般家長咁『請槍』，就算畫到花面貓咁，都起碼係佢做吖，我覺得冇乜所謂。」