蔡思貝欽點胡鴻鈞「情侶檔」拍劇
「視后」蔡思貝前晚與主播俞詠文網上傾偈，期間胡鴻鈞及張振朗「亂入」，不斷留言搭訕，令網民大感興奮！問到在兩位「至愛」中會選誰？思貝直接欽點緋聞男友胡鴻鈞拍劇！
蔡思貝為東網節目《繽FUN Live》擔任嘉賓，好拍檔張振朗及緋聞男友胡鴻鈞一開場已留言支持，不過她只顧答問題，未有為意。她談到曾遭網民攻擊，會睇留言，張振朗即表示：「又話睇留言，唔理人嘅！」胡鴻鈞亦有樣學樣。直播期間，他們繼續搞搞震，間中搭嘴回應思貝，例如講到唱歌時，胡鴻鈞留言：「我跳唱o架！」張振朗則問他：「食咗飯未呀？」
開口幫老友谷劇
思貝之前在網上大展歌喉，獲讚是唱得之人，問到會否跟「男友」合唱？她笑說：「相信佢會抗拒，佢係『情歌小王子』，我同佢唱會影衰佢。」而問到拍劇在他和張振朗間會選誰？她選擇前者：「同振朗拍咗好多部，試過演情侶、出生入死嘅兄弟，如果跳出框框做屋企人都可以。我未同胡鴻鈞拍過劇，試吓都可以。」期間振朗留言叫大家收睇《拳王》，思貝力撐：「一定要睇！我探過佢一次班，佢係乜都肯做嘅演員，我好期待呢套劇。」
遊戲環節播出她在劇集《大帥哥》及電影《陀地驅魔人》的片段，思貝坦言與張衞健合作時手心冒汗，問是否壓力大？她說：「通常係畀佢Charm到，睇到暈吓暈吓，做戲時會擺低仰慕心情，要壓住自己心心眼。」至於與張家輝合作則好像發夢一樣，問到可有捱鬧？她說：「冇喎！還是我唔記得咗？不過我係鍾意畀人『磨』嘅演員，好鍾意畀人折磨！」她又表示想與現為無綫副總經理的曾志偉拍電影，笑說：「《無間道4》得唔得？同前輩級合作，當然想做番專長啦！」