胡鴻鈞蔡思貝 凹凸互補

下月踏入31歲的胡鴻鈞入行9年,今年成為首位「巨聲幫」勇奪《勁歌金曲頒獎典禮》「最受歡迎男歌星」獎項的歌手,又做劇集男主角,牛年運勢愈戰愈強!其緋聞女友蔡思貝亦是「視后」級花旦,2人於事業上共同進發,一凹一凸互補不足。

胡鴻鈞直認與蔡思貝了解中,日前他們到女方親友家拜年,之後思貝駕男方家姐的跑車雙雙離去,胡鴻鈞說:「都係去朋友度拜年,祝大家新春快樂,身體健康!」思貝亦說:「平時好忙,難得新年放假,可以同好朋友見面拜年好開心!」關係明顯再進一步。

畀信心「女友」唱歌

近年胡鴻鈞歌視兩棲發展,他喜歡新嘗試,故此不斷求變:「我個人好矛盾,既鍾意安穩感覺,但又怕悶。呢行多姿多采,拍劇、舞台劇、跳舞,所有嘢我都想試,咁先會成長。」他承認貪玩、愛新鮮感,問到是否經常「3分鐘熱度」?他說:「呢個係我嘅問題。(感情都係?要試好多個?)我好少咋喎!只係拍過2次拖,第1次係16歲讀書初戀,第2次係參加《巨聲2》前。(思貝係第3次?)我哋係好朋友,了解緊,佢做戲、我唱歌,會分享大家擅長範疇,佢對唱歌好有興趣,咁我又開始喺演戲方面提升自己,大家就好似一凹一凸,互相交流!」

提到思貝早前於社交網上載唱歌片,問到女方是否受他啟發?胡鴻鈞表示:「唔關事,佢之前好鍾意唱歌,但未有咁嘅勇氣,我有畀信心佢。(情侶檔合作?)我哋又冇諗喎!可能佢覺得唱歌仲係摸索階段,不過我係好歡迎任何Crossover合作,藝術最好玩嘅就係同唔同人合作,就有唔同火花。」

多年前,胡鴻鈞、許廷鏗與吳業坤同時期比併,現時則與周柏豪齊奪「最受歡迎男歌星」,問到會否覺得被分薄?他說:「呢個感覺真係一啲都冇,宣布獎項同冷靜過後都冇,我覺得每一個努力過嘅人都值得被嘉許。(唔睇重獎項?)我渴望嘅,但我會更着緊自己嘉許係咪值得。」