湯洛雯爆朱千雪拒拍咀戲

藝人湯洛雯（靚湯）、岑杏賢、朱千雪及蔣家旻為邵氏節目《Master's Talk》（《師父有請》）擔任嘉賓，期間朱千雪突然被問到醫生老公是否靚仔？她呆足3秒才識回應，令眾人捧腹大笑，她說：「我覺得靚仔咪得囉！（你係女神有距離？）入行8年來冇畀人追過，但同老公細細個就識，感覺好安全。平時拍劇男拍檔嘅電話都冇，唔需要嘛！」靚湯亦讚她是好女仔，更大爆對方遇到拍劇有性感或接吻場口定必拒絕，絕不會戲假情真，節目主持林盛斌（Bob）聞言表示驚訝，朱千雪解釋拍拖前亦拍過吻戲，但自從拍拖後已盡量拒絕。而靚湯坦言經常被追問婚事感到厭，但承諾若他日訂婚一定會公布分享喜悅。