Kawaii爆女星偷酒店枕頭
繽FUN星網節目《娛樂揞名爆》繼續有張學潤（Nelson）、Kawaii、可宜同大家爆料，今集主題講「貪小便宜」，好多藝人一有機會就攞盡着數。Kawaii爆有女星的行徑令人咋舌：「試過同佢出埠入住酒店，Check out時發現佢間房無端端冇咗兩個枕頭，問佢竟然裝傻扮懵。」
至於Nelson表示有次獲男歌手邀請，擔任演唱會服裝設計：「啲衫已經做起晒，點知佢又叫我幫手買條超名牌牛仔褲，帶去上海畀佢，事後佢同公關公司互相卸膊，唔肯找數！雖然我趕飛機，但都坐喺度唔走，點都要收埋錢先。」可宜目擊有藝人拍廣告後，出動垃圾膠袋「打包」枱上零食，令她大開眼界。