影后露兩手 狂吸35萬粉絲 惠英紅「煮」攻KOL

惠英紅近期忙裏偷閒，空餘時間都會邀約好友聚會，更親自下廚大展功架，並將珍貴的入廚片段上載到社交媒體與粉絲分享。片中見她廚藝相當了得，無論炸雞翼、白玉翡翠珍珠湯、辣子雞、中西混搭煎鯧魚，都駕輕就熟未有把她難倒，單憑刀功和手勢，已展示出其廚藝高超。

她表示近期有較多私人時間，可以相約好友見面：「過門都係客，啲片都係朋友幫我拍嘅，拍咗咪放上網同大家分享囉！通常三五知己嚟到會煮4、5道菜。其實我平時一個人食飯都會煮，人多咪煮多啲囉，咁煮嘢食我又OK嘅。」

大街小巷「搵食」

對飲食相當講究的她，亦不時四出找尋坊間美食。近期因疫情關係不時在深圳休息的她，亦會走訪大街小巷食店，西餐廳、日式燒肉和茶餐廳都有其足迹。不過，有指當地近日出現缺水問題，她說：「未有聽聞，都唔擔心，自己都冇受影響。」對於已有35萬粉絲追隨，獲網友大讚她這位影后級飲食界KOL難能可貴，她謙虛地說：「拍吓片分享啫，唔係轉做KOL，可以同朋友分享美食，已經好開心啦！」