按摩店復業無期 鄧洢玲超失望

鄧洢玲(阿旦)投資的按摩店受疫情影響多次停業,昨日受訪時表示由去年12月10日至今,店舖已停業逾40日,雖然之前有指部分場所或有機會有限度恢復營業,可惜遲遲未有好消息,她說:「我梗係希望按摩店可以開番啦,依家再延長多一個星期,我有啲失望嘅。因為除咗做生意,相信有啲人都想按摩店開番,覺得攰時想揼骨放鬆吓,或者做Facial同埋運動。」

阿旦坦言疫情下做生意困難重重,雖然灰心,但不會再鑽牛角尖,計算損失多少:「最近業主有同我哋傾續約,我哋仍然抱住樂觀信念,會繼續做生意。各行各業都唔容易,希望確診數字快啲回落。」

至於蘇麗珊去年10月分別與男友及友人投資按摩店及東南亞餐廳,開業短短3個月已經歷多次禁聚令的衝擊,她曾表示疫情當前安全最重要,生意方面只好慢慢來。