蔡思貝食飯慶功AA制

蔡思貝與緋聞男友胡鴻鈞並肩作戰,分別贏得「視后」及「歌王」殊榮。胡鴻鈞前晚受訪時避談是否單身,至於思貝則預告會約他食飯慶祝,關係依舊,但埋單會「AA制」。

胡鴻鈞(Hubert)前晚在《勁歌金曲頒獎禮》首奪「最受歡迎男歌星」,對於緋聞女友蔡思貝傳有新歡,以及將他降呢為朋友,他說:「要返去檢討吓自己,可能我當所有朋友都係好朋友。(佢有新戀情?)我關心自己有冇新戀情多啲,有會分享。(你依家單身?)唔回應喇。」但希望有時間約她一同慶祝。

「大家係朋友」

至於蔡思貝昨日則偕王浩信及張振朗等,在將軍澳電視城慶祝劇集《反黑路人甲》及《踩過界II》在台慶頒獎禮取得好成績,準備了蛋糕及果籃答謝各部門同事。提到Hubert成為「歌王」,她表示:「好戥佢開心。佢屬於音樂範疇,我就係演藝,大家一直好似並肩作戰咁。(佢叫你唔好唱歌搶佢飯碗?)咁冇自信?佢係唱歌小王子,我唱歌只係玩,畀條生路行吓好喎!(會唔會一齊慶祝?)未恭喜佢,大家係朋友,都會食飯慶祝。(大家都攞獎,邊個請?)AA制啦,哈哈!)」對於被指搭上有米人夫,她說:「唔係事實嘅嘢唔回應,唔需要澄清,用時間證明我工作嘅努力。」

張振朗自薦做殺人魔

同場的王浩信被問到女兒可有與他慶祝奪「視帝」?他說:「冇,自己唔食得甜嘢,好少食蛋糕。佢知道我攞獎嘅,有恭喜我,戥我開心。」而張振朗與賴慰玲表示心情依然興奮,重溫得獎照片時相當回味,女方更取笑拍檔:「我睇番當晚,你全晚眼濕濕!」他們同樣希望《反》劇班底開拍新題材續集,賴慰玲想做純良教師,振朗則笑言恨演變態殺人魔。

另外,對於有網紅爆料指「張先生」態度囂張,為人「見高拜、見低踩」,張振朗說:「唔係事實唔回應,我唔係咁嘅人,一直做好自己,覺得尊重別人,人哋就會尊重你。」