李靖筠唔願同居 保留神秘感
英皇歌手李靖筠（Gladys）推出甜蜜情歌《嗚哩雙刀》，講述情侶其中1個很凌亂，但另一半不但不嫌棄，反而一齊亂：「所以先會由『嗚哩單刀』變『嗚哩雙刀』，大家喺呢個狀態下共存係最Sweet。（現實中都係咁？）我絕對有凌亂一面，同埋拍拖上，我唔係好鍾意Plan好遠嘅嘢，反而想捉緊每個相處時刻。」與男友拍拖2年多，談到日常相處，她認為生活中的小細節最浪漫：「我哋好簡單，可能轉天氣，我鼻敏感好嚴重，食飯時佢遞包紙巾嚟，我已經覺得好浪漫。如果對方肯喺細節位為你付出，仲難得過搞一堆Surprise，因為代表佢有記住你嘅需要。」
擔心難磨合
MV中的情侶自得其樂地在露營車上生活，問到現實中可接受婚前同居？她說：「暫時未有呢個打算，因為如果見得太多，或太快去經歷一啲應該之後先經歷嘅嘢，都會令關係壽命短咗，珍惜呢段關係，所以未必想冒險。（相見好同住難？）係呀！同埋保留番少少神秘感。（驚畀男友發現你『烏歪』一面？）我驚佢發現原來我一起身真係好靚，哈哈！總有啲嘢驚磨合唔到，所以等我哋關係再穩定啲，先去處理呢啲大問題。」拍拖2年多，但她未有結婚打算：「我仲好後生咋！依家首位都係事業，好多嘢啱啱先開始，想急起直追。」
談到事業，她覺得去年已是超額完成：「有戲拍、有歌出已經好幸運，呢段時間多咗喺屋企創作，亦有時間沉澱、消化吓之前唔得閒諗嘅嘢，例如之後想做咩歌，之前太忙，盲目咗！」有指新人第2年開始難捱，她說：「反而覺得感恩，起碼仲有嘢做，新人第1年慢慢試吓水溫，但依家就要開始建立形象。」