J.Arie撐伍仲衡 抵冷撲飛
著名作曲家、唱片監製伍仲衡原定1月尾開騷，現延至3月底於麥花臣場館連開2場音樂會，邀請近20名歌手做嘉賓，門票昨晨開賣，好友兼嘉賓J.Arie及布志綸現身撐場，伍仲衡感動Fans於凌晨就抵冷排隊買飛，即漏夜出動送熱飲以表謝意。
音樂會反應好，J.Arie笑言好友猶如「名牌波鞋」：「入唔到個網買，可能已經賣晒，好彩我搵咗人幫我排隊。」有份排隊購票的布志綸，成功幫朋友購入10張飛，又笑言跟伍仲衡「比賽」：「睇吓邊個會第1個攞到飛，依家好明顯係我贏，佢都仲未到，之後話會請我食九大簋！」