連詩雅憧憬結婚 過咗3字頭要爭取!

歌手連詩雅與陳家樂緋聞鬧得熱哄哄,2人未有承認戀情,但卻不時被撞破「拍拖」。雖然連詩雅坦言希望事業為重,但對結婚仍有一份憧憬,望可舉行小型婚禮,接受親朋好友的祝福,把片段留給子孫,感受當時甜蜜一刻。

轉眼間入行10年,連詩雅(Shiga)亦來到「30+2」這適婚年齡,近月與「男神」陳家樂傳出緋聞,不時被撞破行街、做運動及食魚蛋,但仍死口不認戀情。自言現階段事業為重的她,希望可以爭取更多演出機會,雖然絕口不提陳家樂,但講到愛情觀時,私底下對結婚仍有憧憬:「過咗3字頭更加要爭取每個演出機會,女仔嘅青春始終有限!(唔諗住結婚?)隨緣囉!其實結婚就好難講實,如果你問我,我覺得結婚係想得到我愛護嘅人嘅祝福,都想畀我最親密嘅人知道,我想有個小小嘅婚禮。」

諗定與子孫「婚」享

問到為何只希望舉行小型婚禮,Shiga笑言只求有個開心、難忘回憶,可與子孫回味:「唔係一定要大排筵席,因為我覺得呢日係一世人好難忘嘅一日,想有啲片段留低畀啲子子孫孫睇。(依家呢個係你結婚對象?)唔知你講邊個。(仲有邊個呀?)唔答呀!私人嘢唔答!」

當初由模特兒變成歌手,近年加入無綫撈埋做演員,Shiga獲得不少拍劇機會,她坦言時間過得很快,雖然近年重心放在劇集,但揚言不會放棄唱歌:「雖然今年好似感覺係拍劇比較多,但其實我喺呢行都已經10年,要搵啲新鮮感畀觀眾!娛樂圈好講求聲色藝俱全,我一定唔會放棄唱歌,唱歌永遠都係我第1位,亦好開心可以參與拍劇。(有冇諗過拎飛躍獎?)我又真係冇咁諗過,因為TVB有好多演員,佢哋比我更加落力,所以我喺呢方面好隨緣。」

激咀袁偉豪嗌尷尬

今年播出的主演劇集《那些我愛過的人》大受歡迎,Shiga有份參演的《使徒行者3》更成為熱話,當中挑逗袁偉豪一幕,雙方激吻足足2分鐘!雖然曾拍攝電影《喜愛夜蒲2》有一定經驗,但她坦言拍得非常尷尬,皆因與袁偉豪本身不太熟:「起初真係好尷尬,因為係我開工嘅第1日同第1場戲,就要同袁偉豪激吻!我同佢本身唔係好熟,之前只係同場玩過小型賽車,但有成40幾人,其實冇乜交流,所以嗰吓真係幾尷尬,仲要錫足2分鐘咁多。」