林德信交換禮物當散貨

藝人林德信、著名音樂人T-Ma孖女友曾詠熙日前現身網台宣傳新歌，自細在美國長大的林德信表示小時候非常期待聖誕節，會提早起身拆禮物，不過返香港住之後就連聖誕樹都放不下，但仍然期待聖誕Party，可以趁交換禮物環節「散貨」：「平時收到啲贊助禮物未必係咁鍾意，就攞出去同人交換，可能人哋好想要呢！」曾詠熙揚言想帶男友返新加坡過節，但因疫情只能作罷，並透露會為男友下廚煮聖誕大餐兼按摩，而T-Ma則大讚女友廚藝了得。