龔嘉欣狼扯Under 羅天宇狂打底護鳥

龔嘉欣、羅天宇、王敏奕、謝東閔、劉溫馨等，昨日在將軍澳電視城宣傳新劇《香港愛情故事》，期間嘉欣與天宇匿入「太空艙」重演「床戲」，天宇又自彈自唱情歌冧嘉欣！而劉溫馨則坐石修大髀，石修更挨住她的心口，最後眾人為嘉欣及謝東閔補祝生日。

嘉欣透露前晚播出1集被天宇唱歌搞喊，更被天宇踢爆喊足2分幾鐘，可惜最後Cut剩2秒！嘉欣又指昨晚有最激的激情戲，天宇怕醜自爆拍攝時險被扯甩內褲：「有個位講嘉欣幫我除內褲，但差啲將入面嗰條除埋，我即刻捉番住，之後我着多2條打底褲，費事嚇親人！（現實中未試過畀人扯甩底褲？）真係未，所以特別緊張。」嘉欣笑言當時太黑，乜都睇唔到！

放大圖片	王敏奕大膽拍Kiss戲，唔驚老公呷醋。

供樓靠自己

談到日前牛一，嘉欣透露好友陳凱琳及譚凱琪各自丟低小朋友上門為她慶祝，又笑言冇男友，但有姊妹陪已足夠！對於有傳她與馬國富二代男友分手，但仍有900多萬新樓及百萬跑車揸手，她澄清雙方從未拍拖：「開始同結束都冇呢件事，對方唔係圈中人，好似影響咗佢，但對我都有影響，以為我封盤。」她指新樓是首置，之後要供樓，希望可賺多些外快，幸好劇集出街引來客戶傾工作，天宇聞言即說：「真係o架？我好似仲未有。（搵你拍底褲廣告？）都得。」

王敏奕大膽咀仔

至於王敏奕笑言前晚1集主動錫謝東閔已是最激：「好大膽，現實中我冇咁嘅勇氣。」又指身在內地的丈夫曾國祥還未睇：「會叫佢快啲睇！（驚佢呷醋？）唔驚，驚做得唔好啫！（如果佢嬲，諗定點補償？）唔會嬲啦！人哋大導演經得起風浪，有咩畫面未見過，哈哈！」又透露老公未能與她慶祝聖誕及1月1日生日，屆時會在工作中度過。