老公被嘲食軟飯 梁芷珮發聲維護:冇佢唔成事!

憑旅遊節目《潮什麼》系列而入屋的藝人梁芷珮,在疫市下狂搵真銀,正是人紅招妒,早前便有網友批評她老公「食軟飯」,令她在社交網反擊,坦言沒有老公便不能成事拍節目,獲大批網友讚好。

梁芷珮今年因疫情關係,未能出國繼續拍攝旅遊節目,育有3名小朋友的她,原以為會收入大減,一度擔心生計,然而世事無絕對,梁芷珮竟成疫市奇葩,在大半年密密接拍逾10個廣告,成為入行以來最豐收的1年,知名度也是最高,走在街上會有人認識。

人妻形象煞食

人妻人母形象竟比過往更受歡迎,她也承認始料不及:「真係冇諗過,其實我入咗公司5年,近呢1、2年大家先知我結咗婚又生咗3個小朋友,可能大家覺得我有家庭,都可以有自己嘅事業,反而更受注意,所以真係好有驚喜。」

愛與網友分享的她,不時開直播與粉絲互動,社交網粉絲已近10萬人,但最意外是連老公Ken亦相當入屋,全因他廚藝了得:「結果大家讚佢煮嘢好叻,老公煮嘢食仲受歡迎過我做運動拍片,開直播有千幾人睇,我自己開都冇咁多,好妒忌!」

畀老公100分

不過人紅自然是非多,早前竟然有網友批評Ken「食軟飯」,令梁芷珮即時為老公平反:「係誣衊!識得我,都知我老公同我一齊拍《潮》,冇咗佢就成唔到事。」對於網友的刻薄留言,她向老公如實稟報:「佢唔識睇中文,因為佢喺加拿大出世同讀書,起初我冇話佢知,因為我睇到個網友咁樣話佢,係不知所措嘅,我最終第2日同老公講番呢件事。(佢點?)佢冇嘢,因為佢根本唔係咁樣。(畀幾多分老公?)多過100分!」