鄧麗欣愛得淡定分開當考驗

藝人鄧麗欣與台灣男星邱勝翊相戀兩年多,縱使大半年來因疫情未能見面,幸而樂觀的她無懼考驗,認為只要感情夠堅固,定必能跨越障礙。

鄧麗欣(Stephy)與邱勝翊(王子)發展姊弟戀,拍拖以來非常甜蜜,不時香港、台灣兩邊飛維繫戀情,不過一場新冠肺炎打亂陣腳,令一對小情侶被迫分隔異地,大半年來僅靠視像通話解相思,認真慘情。

雖然未能見到小男友,但一提起王子名字,Stephy總是甜絲絲,對於疫情令談情時間減少,她說:「都冇得談,連飛嘅時間都慳番。(會唔會反而對男友了解多咗?)係更加令感情堅固,如果咁耐冇見都保持到,就真係真愛嘞!係要畀大家空間嘅,呢樣嘢要感情夠成熟先做到。(點樣保持新鮮期?)點新鮮都一定會過,感情係要累積,依家當係考驗,心靈溝通嘅時候,會講多咗自己嘢。」

與方力申各有回憶

問到他日與王子「重逢」,會否立刻去結婚?Stephy聞言即瞪大雙眼說:「咁長遠?未來大家都唔知,順其自然。(係咪一定需要結婚?)漸漸覺得唔係,冇咩嘢必然,最緊要舒服。」

談於舊愛方力申,Stephy坦言再見亦是朋友,雙方至今也有正常交流,提到小方自爆夾萬收藏了其唱片,Stephy說:「我唔知呀!(覺得係回憶?)都係嘅,唔知點答,大家有各自唔同回憶,冇必要刪走佢,咁就順其自然。」

拍排球戲感觸良多

最近Stephy於ViuTV劇集《男排女將》飾演排球教練,鑑於入行前曾是香港青年排球隊,求學時亦曾教導低年級師妹,所以演繹時甚有回憶,她說:「一直都好想拍排球題材電影或劇集,終於有機會,希望可以做到最好,因為應該唔會再拍第二部。(隔咗10幾年再拍本地劇?)係呀,兩次都係運動題材,感覺好唔同,當年係新人,抱住戰戰兢兢心情,未識享受角色,今次可以放經驗入去,配音時勾起好多以前嘅畫面。」