羅霖榮升奶奶雙喜臨門

「美魔女」羅霖榮升為奶奶!剛在美國大學畢業的次子劉子熙(Jordan),在本月8日於當地跟拍拖一年多的日德混血兒女友Dhyana註冊,可謂好事成雙,但鑑於疫情肆虐,羅霖未能親身到場見證。婚禮在叢林中舉行,穿上設計簡約婚紗的Dhyana肚凸凸,腰肢圓潤,她在社交網留下愛的宣言,說能成為Jordan的太太感到光榮及驕傲。

暫時墊支結婚支出

羅霖昨日接受本報訪問,對於Dhyana在婚照中肚凸凸,她即代新抱否認奉子成婚:「新抱唔係有咗,可能套婚紗嘅設計,先有肚凸凸嘅錯覺。我叫佢哋好好計劃,等經濟獨立先至生小朋友,唔好咁急,要好好享受二人世界先。佢哋咁快結婚,一來係熱戀中,二來係唔想分開,Jordan想結婚後喺當地居留,同太太一齊生活,依家佢搵緊工,新抱出年先畢業。如果囝囝搵到工,各方面穩定嘅話,我就可以輕鬆啲,當然結婚開支暫時我要資助,囝囝話將來搵到錢會畀番我。等疫情好轉,先飛去補辦。」

讚新抱充滿正能量

多了奶奶這身份,羅霖開心的說:「冇諗過囝囝咁快結婚,做奶奶係好開心,因為我好鍾意呢個新抱,覺得佢好正面、充滿正能量,係開心單純嘅女仔,希望囝囝好好珍惜,因為好難得可以同真愛喺埋一齊。我同媽咪同新抱視頻咗好多次,我哋仲同佢講:『你唔使擔心Jordan會蝦你,我同媽咪都會支持你。』」另外,在內地工作超過1個月的她,說工作方面尚算順利,酬金不俗,最不習慣的不單要捱過14日隔離外,離家多時會擔心母親的健康,故會常常視頻通訊。