林利夜闖病房心痛母親被綁手滲血

藝人林利的母親在醫院留醫,他因擔心母親的情況而緊張得夜闖病房,驚見媽媽向他發出求救及被綁,插着吊針的手背流血,心痛的他愛莫能助,內心難受得淌血。

林利的80多歲母親日前不適入院,因為疫情關係,他未能到醫院探病,憂心忡忡的他連日來在社交平台抒發情感,並隔空為媽媽打氣。他昨日凌晨走到醫院病房,看到母親在板寫上「打999」向他求救,見到媽媽被綁及插上針的手有血滲出,他表現激動,片段中聽到他安撫媽媽說:「唔使怕,我帶你走,回家我請專業人員幫你忙。」而林母因喉嚨插喉無法說話,只不斷發出呼嚕聲,當醫生出現時,他捉住媽媽手問:「點解呢啲冇處理呢?定忙得滯處理唔到呢?」他亦有跟醫生致歉:「唔好意思呀醫生,呢個係我阿媽,我心情係會激動少少,但係正常嘅。」

自責衝動唔啱

事後林利自責衝動咗少少:「當然我知自己唔啱,但唔知應該點先啱,我諗好多家屬跟我有同樣問題,媽媽插住喉,我唔知可以做乜,入到去睇到媽媽就心痛,可能媽媽驚同緊張,成日去掹支針,所以佢哋綁住佢。」他坦言前日下午到過醫院探望:「其實醫院都有啲人情味,下晝入去幫佢鬆咗綁,到夜晚唔知點解,好似心血來潮感應到佢叫我去救佢,我咪再上去。」他指醫院昨日有致電其胞弟反映意見,不希望他再到醫院:「去到我會忍唔住又入去。」他透露媽媽喉有腫塊壓着呼吸,抽組織化驗要兩星期後才有報告。

由於醫院不准探病,不太知道病房的情況,他說:「好多嘢我都好疑惑,有好多盲點,就好似我喺台灣返嚟做檢測,冇一張紙話我知係陰性定陽性,就咁叫我返去隔離14日,冇一個準則,14日再做檢測,但係咪嗰個人嘅口水又唔知,我覺得好大漏洞,我好驚、冇晒信心,只係得個等字,生命已經唔係自己可以控制,可以開聲就開聲,唔通喺度等死?」