仙樂都凸肚 行街撩仔仔

藝人仙樂都(吳堯堯)日前與男友梁國鋒入紙註冊,11月中將簡單簽字結婚,由於其身形脹了一圈,所以被傳雙喜臨門。日前見她獨自現身淺水灣行商場,身穿連身裙加牛仔褸的她腹部微隆,揀初生BB衫時雙眼發光,又用眼神撩身旁的小朋友!

遠赴泰國尋母

結婚在即,仙樂都爆出感人身世,原來其父母已離世。當年父母很恩愛,但泰籍母親在港誕下她不久,就因過期居留被遞解出境,之後無法再申請來港,她坦言:「到28歲我先知道真相,爸爸有去搵過媽咪,當時搭完飛機仲要坐兩日車先到媽咪住嘅地方。媽咪屋企種糯米,好偏遠,一個男人帶住個女,又要搵食,唔可以成日飛過去,但知道媽咪為勢所逼,冇遺棄過我。」

她透露爸爸一直沒有再娶,對媽媽一往情深:「我媽咪係大好人,佢上一段婚姻生咗4個仔女,我同4個同母異父嘅兄姊相處都OK。媽咪上年離世,哥哥姐姐留咗啲田畀我,所以我可能遲啲都返泰國住。」