Cheronna醉住掃墓 全程想嘔

吳嘉熙（Cheronna）與余香凝（Jennifer）日前宣傳新歌，大談飲醉酒經歷。Cheronna自爆飲醉會嘔黃膽水，最激試過醉住陪家人掃墓：「辛苦到冇乜點瞓，搭巴士去掃墓，全程係瘋狂作嘔狀態。」Jennifer則自爆參加婚禮時飲到「斷片」：「當時第一次參加海外婚禮，其實同主人家唔係好熟，但係好開心，我衝出嚟玩遊戲鬥飲酒，咩酒都溝晒！最後印象係第二道菜，第二朝清醒番，我同朋友講『尋晚冇嘔都幾叻』，點知望一望張床，全部都係嘔吐物。之後朋友問我頭有冇痛，原來我當晚堅持飲酒，推低啲勸酒嘅朋友，自己都撞咗埋牆，成個過程完全冇印象。」