泳兒疫境出騷 收最佳生日禮物
泳兒與陳柏宇同樣有份演出疫情下舉行的音樂會，她自爆為確保安全「重裝備」上陣，帶備十個口罩、五支消毒酒精傍身，但沒有出動私家咪：「大會話啲咪都會消毒，仲有叫我哋做足防疫措施。（叫你哋唔好落台握手？）呢個冇安排，不過大會話唱嗰陣可以唔戴口罩。（你會唔會戴？）未必會，戴咗覺得會影響唱歌效果，盡量企遠啲，唔好太近啲樂手，已經叫定助手當我唱完一落台就遞個口罩畀我。」
昨日生日的她又指音樂會是最佳的生日禮物，並興奮地說︰「聽到觀眾嘅歡呼聲好興奮！」還冧爆收到一份神秘禮物，但竟然不是髮型師男友送出：「有個蛋糕同埋可以去酒店Staycation，有問男友係咪佢送，佢話唔係，仲Feel到佢有啲嬲嬲哋問係邊個送、男定女，最後原來係一位識咗好耐嘅新加坡女友人送，依家畀朋友『搶閘』送咗呢份禮物，唔知佢有咩驚喜。」
另外，同場的鍾舒漫孖妹妹鍾舒祺搶眼登場，鍾舒漫笑謂成年冇出騷，一上台就好緊張，幸好沒有發台瘟。