戴祖儀踩過界一癦相承
歌手戴祖儀獲日本知名藝術家橋爪悠也以她真人作為藍本，創作卡通版的人偶雕塑，人偶精緻得連她面上的癦也活靈活現。她自覺成為「幸運兒」，希望在藝術界、潮流界有另一番作為。
鍾情潮流藝術品的戴祖儀，其主理的藝術品牌最近邀得日本藝術家橋爪悠也（Yuya）合作，本月中將在上環舉行首個個人展覽，祖儀更有幸成為Yuya第一次以真人作為創作人物的藍本，將她肖像製成人偶、版畫等擺設，她說：「係我自己向Yuya提出呢個建議，好開心成為老師筆下嘅角色，好開心好榮幸，人偶細緻到連我面上粒癦都有，佢知我好鍾意音樂，所以特登襯番個木結他同好多音符。」
珍藏一比一人偶
她笑言自己樣子經過老師卡通化後，有種既熟悉又陌生的感覺：「我一直喺音樂路上不斷努力，希望大家從老師嘅作品，睇到我對音樂嘅熱愛，喺未來推出嘅新專輯，有機會用到Yuya嘅作品為封面。」正式展覽當日更會展出與她1.7米等高的立體雕塑，她說：「呢個一比一人偶，只作收藏唔會賣o架！」
真金白銀買木櫈
祖儀昨日亮相旺角的期間限定店，吸引大批粉絲支持，她笑說：「今日我要冷靜啲，有番藝術家嘅氣質。」她本身也有收藏Yuya的不同作品，她說：「佢喺日本好有名氣，好開心可以同佢合作搞展覽。」她真金白銀買了一張手工製的木椅收藏，笑說：「大家放心，我都冇任何折扣，因為每張櫈嘅木紋都唔一樣，我揀咗張自己鍾意嘅木紋啫。」已經收藏過百件藝術品的她承認愈買愈多，租了兩個貨倉存放：「仲有位擺嘅，但我銀行戶口就未必應付到，所以要努力做嘢囉。」