何雁詩貼8蚊氹鄭俊弘上床
準新人何雁詩及鄭俊弘（Fred）前日過大禮後，隨即孖住開工拍攝MV。Fred大爆MV中有大量床戲，有如真人騷，何雁詩笑言付了8元酬勞。受禁聚令影響，他們宣布今年不會擺酒，但結婚當日會做足接新娘及簽字註冊的儀式。
何雁詩自資5位數字拍攝新歌《基本戀愛套路》MV，昨日在尖沙咀一酒店取景。歌曲是送給Fred的結婚禮物，所以MV男主角只能讓未來老公上陣。問到Fred是否不收酬勞？她笑說：「象徵式畀番8蚊佢，我有話畀條金鏈佢。」但Fred貼心說食餐飯就得，又大爆MV中有大量床戲：「真係我哋嘅私人生活，有親熱鏡頭、搞笑嘅、戲劇嘅。」何雁詩再爆Fred拍到好尷尬：「佢要喺咁多人面前錫我，成日都提佢要Sweet啲。不過知佢開始攰，尋日過完大禮就過咗嚟呢度瞓，一早就起身拍。」
計劃私人派對慶祝
提到日前過大禮，記者連番恭賀，二人即笑不攏嘴，冧樣盡現！講到被各方催生B，Fred就話婚後想先過二人世界，之後再造人。何雁詩特別感謝姊妹團成員陳瀅、賴慰玲、蔡思貝抽空出席，更講笑話將她們統統「降呢」：「佢哋平時拍戲做開一姐，尋日個個變晒做臨時演員，大妗姐叫佢哋拍手畀反應都照做。最出色嘅係思貝，感動到喊，真係要畀個飯盒佢。」
至於會否如期於11月7日擺酒？何雁詩指會延期舉行，但因為2020年是好年，當日會照樣進行接新娘儀式及簽字，不過簽字地方還未「扑槌」：「過完大禮先有呢個決定，想搵個私隱度高啲嘅地方，搞個小型慶祝。」
龍鳳鈪全戴
問到Fred過大禮花了幾多位數？他扮傻話：「唔記得啦！大家開心就得！」何雁詩則爆對方「落重本」，又「投訴」爸爸非常開心，全日只攬住Fred，當自己冇到。金器方面，她表示有2、3對龍鳳鈪及兩條金鏈：「屋企人會再送。（戴晒怕唔怕重？）送畀我嘅全部都會戴晒，因為係心意嚟。」