尚羚少郁動行路喘晒氣
樂隊結他手阿正（馮庭正）的太太尚羚（Sherine）早前現身尖沙咀Shopping，懷有7個多月身孕的她穿貼身短裙仔，肚子又圓又大。她全程專攻BB用品，連行幾間專賣嬰兒車的店，但似乎未揀定，最終空手而回。
Sherine透露剛收到醫生報告，得知血糖正常後放下心頭大石：「之前唔想咁早公布喜訊，一來怕小器，二來擔心自己血糖超標，因為家族有糖尿病史，公公同媽咪都有糖尿病，好擔心遺傳。啱啱出咗報告，好開心血糖正常，但我唔夠鐵質，可能早排泳池冇開少咗做運動，依家行路耐啲都會有啲氣喘。」
