「驚嚇演員」有料到 張盈悅率先簽約無綫

跟冠軍謝嘉怡同是海外佳麗、來自洛杉磯的張盈悅,雖然出師不利落選收場,但卻是今屆港姐中首個被無綫睇中,已簽約加盟成為旗下藝員。據知因近年無綫鬧花旦荒,無綫認為張盈悅的外形獨特及有性格,最特別是已受過專業演藝訓練,故獲睇高一線。

22歲的張盈悅畢業於美國音樂及戲劇學院(The American Musical And Dramatic Academy),擁有舞台劇經驗外,更曾在全球最大、專營萬聖節活動的公司擔當「驚嚇演員」。觀其社交網的發文,可見她有風趣幽默、我行我素的一面!她昨日網晒郊遊及看猴子的短片,見她以戴帽素顏的「四眼妹Look」上陣,不施脂粉。她日前又網晒獨照並拋金句:「眼神洩露靈魂,一睇就知我冇精神。」又上載去年以學生造型演出的相片,自嘲現時年紀大:「冇o架喇,上年咋,歲月不饒人,蒼天饒過誰?」