張敬軒餐廳捱得住執番身彩

久未公開露面的歌手張敬軒前晚出席英皇電影首映,直言疫情下與內地居住的雙親也接近一年沒見面,望通關後即飛奔探望,而投資的法國餐廳同樣受疫情影響,曾停業兩個月,幸而重開後午市反應佳,總算執番身彩。

女星蔡卓妍(阿Sa)參演的新片《聖荷西謀殺案》前晚舉行首映,老闆楊受成率領張敬軒、衛詩雅、郭奕芯、湯怡等撐場,而林子祥夫婦、胡曦文等亦有出席,場面熱鬧。已有一年沒有公開露面的軒仔,透露因疫情關係,已有11個月沒有與身在廣州的父母見面,他說:「父母嗰區曾經有兩個確診,托賴佢哋好乖冇咩出街,希望疫情過後盡快返去,佢哋都係高血壓呢啲小毛病,曾經有諗過返去,但前後要隔離28日,最後父母話唔好返。」

阿Sa懶理分手傳聞

談到其法國餐廳,軒仔不諱言受疫情影響曾停業兩個月,不過未有辭退員工:「好多人話市道唔好難搵工,但我餐廳就有兩、三個同事另謀高就。(生意額有冇影響?)最差嘅時候係冇開,有得有失,不過開番之後,餐廳午餐時段生意好過之前,算係執番身彩。(回唔回到本 ?)唔會回到本住,好在業主都有租金優惠。」

而阿Sa則表示邀請了媽咪及公司同事前來捧場,男友石恆聰則稍後再入戲院觀賞,問到為何不趁機以行動澄清分手傳聞?她說:「冇就冇啦,使鬼澄清,佢哋收錯風。(感情好穩定?)我哋有分數,都唔會因為傳聞嬲,成日有新聞話結咗婚,又傳有咗,來來去去都係呢啲新聞,大家都好成熟,唔會影響我哋生活。」

葉蒨文心思思唱歌

至於林子祥(阿Lam)與太太葉蒨文同聲表示很久沒有入場睇戲,談到與兒子林德信合作廣告歌非常洗腦,阿Lam笑指此乃廣告客戶想要的效果,在旁的葉蒨文亦笑說:「真係去邊度都聽到,喺屋企又聽,已經入晒腦。(你想唔想唱歌同拍戲?)唱歌一直有人搵,其實有機會都可以試吓。」