美國男星韋史密夫（Will Smith）的藝人兒子積登（Jaden），被爆與美國男歌手Lionel Richie的模特兒女兒Sofia拍拖，兩人多年前曾傳出緋聞，近日更被拍到於美國加州馬利布海灘鴛鴦戲水，拖手互攬，認真Sweet！
今年22歲的Sofia，4個月前與美國真人騷女星Kourtney Kardashian的37歲花弗舊愛Scott Disick經歷多次離合後，終於分手，結束3年情。不過Sofia已經收拾心情，與同樣是22歲的「星二代」積登撻着！
積登與Sofia被拍到於馬利布海灘度假，同場還有曾與積登妹妹葦蘆（Willow）拍拖的演員好友Moises Arias及其現任女友。知情者透露：「佢哋成個下晝同朋友喺海灘玩，但Sofia同積登嘅目光只放喺對方身上，佢哋一齊游水，仲互相擁抱，上水落水都拖住手。佢哋對住微笑，成日都喺度打情罵俏。」其後兩對情侶前往日本餐廳食晚飯，非常盡興！
其實積登與Sofia於2012年已經傳過緋聞，當時兩人僅得14歲。而Sofia跟Scott拍拖前，亦曾與加拿大天王Justin Bieber拍拖。積登之前傳過斷背疑雲，被指與饒舌男歌手Tyler, the Creator過從甚密。