蕊蕊驚「見光死」私藏男友有「婚」數

藝人蕊蕊與金剛分手多年,終傳來喜訊與圈外男友Mr.Chan熱戀中。曾抗拒與圈外人拍拖的她,給予現任男友80分高度評價,明言雙方朝着結婚方向發展,但為免戀情「見光死」,她堅持保持低調,將男友當作「受保護動物」。

蕊蕊2016年與金剛分手,終於覓得如意郎君。談到與男友相識經過,她甜絲絲透露是在朋友介紹下認識,至今已「了解」一年多,對方給予她莫大的安全感:「佢唔鍾意出去玩,如果我出去,佢又唔會點管我。(會唔會同你出去?)佢好怕醜,試過帶佢出去,介紹朋友畀佢識,不過佢真係唔講嘢。」

雖然男友不懂浪漫,但蕊蕊仍給予80分,坦言雙方有結婚共識:「佢好重視我,畀到安全感我,但唔識浪漫,好似情人節咁,我要同佢講記得買花畀我。(最夾嘅一個?)都係,我同佢好多嘢都好似,大家都幾鍾意留喺屋企過家庭式生活,我哋都係朝結婚方向發展。(會生小朋友?)我覺得自己都係小朋友,未有計劃,諗起要生真係好大壓力,我仲有好多嘢想做。」談到何時公開男友神秘面紗,她卻耍手擰頭,拒絕讓他曝光。

同行內人拍拖嫌麻煩

曾揚言不會與圈外人拍拖的蕊蕊,承認想法有所改變,她說:「啱啱入行嗰陣,同一個圈外男仔一齊,佢好唔明白我哋工作模式,有時通宵拍戲後,食少少嘢先返屋企,但佢都唔放心,有時又會覺得我哋好多誘惑,面對好多靚仔靚女,但其實我哋見慣冇咩感覺。試過同圈內人拍拖,又係好麻煩!」