歐陽震華疑被上身 夾中指自救

娛樂圈不時傳出靈異事件，孫慧雪自爆家中疑似鬧鬼：「我屋企之前有兩位工人姐姐，不約而同話喺唔同地方見到有個女人喺我屋企出現，仲會聽到廁所有扭門聲。之後我新請嘅姐姐，都成日話有人扭廁所門。」雪雪初時覺得工人姐姐「諗多咗」，直至一晚，她終於親身經歷，她說：「我氹完小朋友瞓覺就熄咗床頭嘅音樂公仔，突然間，小朋友好大聲咁喊，同時個音樂公仔竟然放音樂，嗰吓我毛管戙有啲驚。後來長輩好擔心，請咗風水師傅嚟睇，師傅入到廁所話起晒雞皮，話廁所有嘢，要幫我哋趕走，最後佢做咗個儀式。因為我同老公係教徒，所以唔係特別驚。」

握佛牌驅寒

至於歐陽震華（Bobby）坦言經常遇詭異事件，最恐怖一次是數年前到成都工作。當時他被安排入住酒店的尾房，期間房內傳出開篋的拉鏈聲，風筒又自行開關，他心知不妙，即以普通話說：「好快好快，我15分鐘就走。」未講完，他即有特別感覺：「當時好似『菓子鹽』掉落水『炸』一聲，個感覺由隻腳趾一路『炸』上頭頂，呢吓就好驚啦！覺得好似有嘢入咗我身體，即刻打畀經理人。佢一過嚟，我就話落去餐廳，之後講咗件事畀佢聽，我個身一路好寒、好震，好似有嘢入咗去。咁點呀？都要繼續做嘢。去到工作地點，我話攞對筷子嚟，跟住自己夾自己中指，夾完後又冇乜反應。我出埠有帶師傅畀我嘅佛牌，咁我攞出嚟，雙手攞住好似合十咁，真係唔到你唔信，即刻有一股暖流由隻手慢慢喺身體驅散寒氣，個人就唔震，咁就當冇事。」

鄧月平招惹「朋友」

家人從事驅鬼法事工作的鄧月平透露，早前拍戲曾感覺有「朋友」在場：「當晚拍到午夜12點左右，轉場去工廠大廈，一入到去已經有種抖唔到氣同想嘔嘅感覺。拍到一半，我耳仔聽到啲聲，身後有一股壓迫感，覺得應該招惹到啲『朋友』嚟睇拍攝。由於感覺愈嚟愈強，最後忍唔住同劇組講停機拜一拜神先，之後先好啲。」而經常主持靈異節目的梁思浩分享「鬼借衫」的真人真事，有次他拍古裝劇時，有人發現欠兩套戲服，但負責服裝的工作人員堅稱已借出20套，有女同事提議將一盒撈了滾水的白飯放在樹底，並大嗌「食飽就過主啦」，之後「失蹤」的戲服在樹林出現，非常離奇！