紮紮跳坐唔定 余曉彤由細「瘀」到大
藝人余曉彤（Hidy）既是潛水教練，又是長跑好手，由細到大都與運動結緣，她說：「爹哋喺我5歲時過身，媽咪改嫁，我由嫲嫲同5個姑姐湊大。姑姐驚我學壞，對我好嚴厲，不停叫我學嘢，結他、鋼琴、畫畫、中國舞，全部都好女仔，但我坐唔定，成日去踢波、游水、跑步、爬樹，好男仔頭，仲成日玩到周身瘀！」
她最難忘是未能考入心儀中學：「我一直好想讀體藝，但派咗去另一間學校，所以嗰年好畀心機讀書，考到全級第一名，又攞到體育學科獎，以好成績轉去讀體藝，之後玩運動玩得仲癲，身邊朋友全部玩運動，好開心！」Hidy覺得運動就如她的良朋益友，特別是長跑令她找到做人宗旨：「第一次跑10公里，好辛苦，但一直堅持冇停，長跑過程中只要有意志，堅持唔放棄就可以成功，呢樣亦成為我嘅生活態度！」
