同郭奕芯拍拖親上加親？ 楊天宇：唔好搞我！
英皇藝人郭奕芯（Ashina）及楊天宇（Angus）合作ViuTV節目《辣伙頭·開火》，甫見面即不停鬥嘴，十分爆笑！Angus笑言今次拍節目的快樂是來自Ashina身上：「有時無意中聽到佢講啲嘢幾好笑。（節目內成日鬥氣？）我承認一開始係多啲，但去到後期攰啦，同埋睇淡件事，我又何必好似針對佢咁。」
Ashina：佢冇特登餵我！
Ashina就酸溜溜踢爆對方常與另外兩位隊友陳欣妍、譚凱倫互餵食嘢：「但佢冇特登餵我，唔講出口都唔餵，好衰！佢同譚凱倫係直接擺食物落口，而我哋係會擺喺個羹度再餵，佢徒手餵係Sweet啲，令我好妒忌！」
兩人愛鬥嘴，又分屬同門，可有機會發展「親上加親」？Angus未聽完問題已落閘：「千祈唔好！」Ashina笑說：「我哋食飯曾經有人問佢鍾意咩類型，佢無啦啦話總之同郭奕芯相反，我真係躺着也中槍！」Angus即搶住解釋：「咁係因為真係吖嘛！（你擇偶條件係咩？）同佢180度相反，即係聰明、矜持，哈哈，但佢OK嘅，作為朋友。」Ashina亦「反擊」：「我鍾意成熟穩重嘅男仔，大我好多年，唔鍾意好似小朋友，呢啲拍拖OK，但唔好結婚。」Angus即耍手擰頭：「嘩，唔好搞我！」