劉溫馨搵啱目標唔敢偷食

劉溫馨日前直播教大家整蔬果汁，所謂「工欲善其事，必先利其器」，她對榨汁機的運用相當熟練，兩三下手勢就可以整到一杯「快、靚、正」果汁，絕對有潛能開舖賣汁！

減5磅身形Fit爆

談到今次做直播，溫馨直言事前都有少少緊張，穿上背心短褲的她，身形Fit爆，原來她正進行蔬果汁排毒：「我學激減60磅嘅蕭徽勇進行緊呢個排毒方法，已經12日淨係飲蔬果汁，感覺好好。（擔唔擔心身體負荷唔到會暈？）完全冇問題，我加埋早睡早起，個人仲精神咗，覺得自己可以去跑馬拉松，皮膚都好咗！」她笑言排毒期間當然都有肚餓，但不算辛苦，亦冇偷食，12日已輕了5磅，問到目標磅數是多少？她笑說：「希望廿磅啦！」

「滿意價」接Job

新冠肺炎疫情令到百業蕭條，溫馨亦很感恩能有拍劇以外的工作，她說：「我已經幾日冇出門，依家有得出嚟，仲要係做嘢，我真係好開心，感覺都唔同咗，覺得啲能量返晒嚟！（酬金如何？）我唔記得喇，但經理人同我講係滿意價嚟！其實有工開，我真係已經好開心同好滿足！」