吳業坤鬧波友垃圾 Lincoln反擊：廢柴

對人對事面面俱圓的吳業坤近月無名火起，不停在社交網喪鬧天堂鳥成員Lincoln（許俊豪）、羅天宇、余德丞、何廣沛及幕後人是垃圾，Lincoln不甘被公開「鞭屍」，反擊吳業坤是廢柴！唱片公司高層見二人隔空互罵，即向Lincoln了解事件。男人鬧交，多數離不開錢與女人，但據知眾星「攬吵」，全因吳業坤未夠班又要撩人打機，輸了即唔忿氣鬧人發洩，其波友「頂唔順」寸他是「獨食精」及「搶波王」！

「爭女佢哋唔夠我嚟」

吳業坤昨日受訪時否認爭女或搶工作：「放心，爭女佢哋唔夠我嚟！（搞到Lincoln被公司了解？）咁我個個都鬧吓、搞吓佢哋先。」並透露近月迷上打籃球的手機Game，雖然和眾星是好友，不過所謂「戰場無父子」，每次被波友累輸波，他都會嬲到震，但強調沒有傷及彼此友誼：「咁男仔唔會咁小器嘅。」

暗寸坐享其成

至於Lincoln表示和吳業坤是「機友」：「打機個機，亦係操肌嘅肌友。」據知，他在該籃球遊戲的香港排名頗高，他謙稱：「最高係第6位，不過呢排跌到十幾，都用咗1千蚊課金。」又指羅天宇、余德丞與何廣沛亦是高手，「女神級」的余思霆都是隊友。問到吳業坤成績如何？他大笑說：「佢100名打後啦！（係咪唔受佢玩？）佢級數都唔同，不過都有約佢一齊打嘅。」問到覺得對方「機品」如何？他暗寸吳業坤喜歡坐享其成：「感覺係佢坐喺龍門等餵飽囉。」