鄧美欣水着「泰」注目 暖男護花
前港姐鄧美欣早前孖弟弟去布吉旅行，旅程中不幸遇竊失財物，打扮清涼又惹來當地男士行「注目禮」，感激身邊有細佬護航，不禁直呼：「有細佬好過有男友！」
泰國是不少港人度假聖地，在《娛樂大家》擔任「娛樂女郎」的前港姐鄧美欣（Venus），早前與弟弟於疫情爆發前飛到布吉旅行，度過四日三夜的姊弟之旅，笑言主要目的是出走散散心：「當時我心情麻麻，就好即興問細佬：『不如我哋一齊去旅行！』佢亦好爽快應承陪我去。相隔六年再一齊去旅行，我發現大家都成長咗好多！呢個旅程除咗吃喝玩樂，亦好感恩有細佬喺我身邊。」兩姊弟分工合作，Venus負責安排行程，弟弟則擔當「人肉GPS」帶路，過程中雖有小摩擦，但彼此都會互相遷就。
堅拒騎大象：真係好殘忍
兩個年輕人去到泰國釋放活力，狂玩大量戶外活動，如浮潛、獨木舟及竹筏漂流等，盡情感受陽光氣息，Venus更曬得一身健康古銅肌膚！兩姊弟又近距離與大象接觸，實行親親大自然，但她堅拒騎象：「其實幫大象沖涼都已經係一種接觸，根本唔需要去騎！我見到佢哋耳仔同隻腳都穿住鐵鏈，真係好殘忍，所以好抗拒騎大象。」開心背後卻遇上不快事，兩姊弟玩水上活動前將貴重物品放入儲物櫃，回來發現竟遭偷走小量現金及弟弟的名貴手錶，隨即到警署報案，她笑言在旅程中留下難忘回憶，還幸災樂禍：「其實個小偷幾有眼光，細佬隻手錶成萬蚊，冇辦法啦，鬼叫佢咁蠢！去旅行都戴住隻咁貴嘅錶，唔抵可憐！」
面對陽光與海灘，出發前已準備充足，Venus帶備泳衣來個異地大解放，盡展纖瘦身材。今次旅程中所有靚相都出自弟弟之手，笑指他「訓練有素」：「其實我好多相都係佢影，佢畀我訓練得多，太清楚我邊個角度比較好睇，所以好鍾意同佢一齊去旅行。」擁有天堂般的享受，身旁卻不是情人分享，令她忍不住直呼想拍拖：「喺呢啲咁舒服嘅地方，同男友去當然係最好，但可惜我冇！」
驚酒店有鬼𢱑細佬同房瞓
回想旅程一點一滴，Venus不禁對弟弟讚不絕口，讚他是暖男：「我哋Book咗間好大嘅度假屋，細佬就讓咗間大房畀我，但我不嬲都好細膽、好驚鬼，入夜一熄燈就疑神疑鬼，糾結咗幾個鐘都瞓唔着，最尾我敲細佬房門，佢就好貼心咁搬咗張床褥喺我隔離打地鋪瞓。」由於當地天氣炎熱，她幾乎日日以背心短褲清涼打扮，自然引來不少男士喪(目及)，令她感到不自在，幸其弟默默擋在前方，讓她笑說：「當下覺得有細佬好過有男友，好有安全感！」