方力申冇得獵艷 Mon實舊愛
藝人方力申、周柏豪、胡鴻鈞、蘇皓兒及馮允謙昨日出席籃球賽，小方透露其泳會7月重開，疫情期間收入少，泳會支出卻很多：「燈油火蠟，仲有教練人工，所以我都申請咗政府資助，同埋問政府借幾十萬周轉。（損失慘重？）冇計幾多，但都入肉(o架)啦！」
有睇Stephy新作
問到疫情期間可有結識女生？小方即搞笑說：「失望呀，梗係冇啦！」有傳其舊愛鄧麗欣（Stephy）與台灣男友邱勝翊（王子）感情變淡，並與他翻撻，他說：「我好唔八卦，無中生有！唔知點解有呢啲新聞，可能因為人哋有戲上。（你好留意喎？）其實我有多重身份，真正身份係娛樂人，所以會留意娛樂圈嘅嘢。（有冇睇過套戲？）梗係有，金像獎我有份投票！（佢係咪真係感情轉淡？）大佬呀，阿媽尋日食咩我都唔知啦！（仲有冇同佢聯絡？）真係好少。」
柏豪聯絡余文樂「破冰」
同場的柏豪指7個月大的囡囡已識叫「爸爸、媽媽」，更笑言囡囡先叫爸爸，令他冧爆！他坦言想追多個，湊夠一家四口：「但要等太太康復先，醫生話等囡囡一歲大先再追。（想追個仔？）冇所謂。」他又主動提起曾傳不和的余文樂近日宣布太太再度有喜：「好戥佢開心。（恭喜咗佢？）係呀，大家有聯絡。（有冇見面？）冇，佢去咗台灣住，比較難見。」
