蘇皓兒狠斬桃花拒羅天宇「收割」

蘇皓兒笑言與羅天宇太老友，撻唔着愛火花。

藝人黃翠如、連詩雅（Shiga）、蘇皓兒（Chloe）與陳自瑤等，昨日到電視城出席劇集《那些我愛過的人》宣傳活動，席間大玩遊戲，Chloe隔着膠片錫顧定軒之餘，又要餵李任燊食蕉等。講到與羅天宇因一張大合照而傳緋聞，Chloe表示兩人同屬一籃球隊，認識很久亦影過很多合照，奇怪現時才傳緋聞，並解釋相中同坐的原因：「因為鏡頭好低會影到我包包面，所以叫佢陪我一齊坐低。（點解叫佢？）因為我哋都係Shooter位，但佢斯文、溫柔，我就粗魯、男仔頭。」

講到有否發展機會？Chloe自言喜歡陽光型男，但笑言與羅天宇太熟，直言「冇咩火花」：「佢鍾意啲好靚、長髮嘅女仔。（你都靚呀！）還好啦！」問到現時可有追求者？她坦言：「冇呀！但我都唔恨拍拖，享受單身！」又笑言屋企裝修時在房擺放了乾花，未知是否因風水問題而有緋聞及假桃花，故回家要拿走乾花。

李任燊有「女神」蘇皓兒餵食蕉，恨死其他男同事！	翠如自誇天生「虎鼻」，對整容報道得啖笑。	連詩雅與陳自瑤由拍檔變閨蜜，齊齊谷劇。

翠如「虎鼻」有福 唔敢整容

同場的翠如與Shiga齊齊受訪，講到Shiga下周一32歲生日，她表示要開工拍廣告，被問到緋聞男友陳家樂可有約慶祝？她即避談：「未知生日會做咩，但會同公司同事慶祝，周柏豪都會嚟。（叫陳家樂嚟？）唔啦！我哋係公司自己慶祝。」翠如則透露要連續11日開廠，故提早與她食飯慶祝。

講到翠如被傳與好姊妹唐詩詠整容變「木偶鼻」，她即否認：「大家可以睇番我以前有線嘅節目，同埋我最靚就係個鼻，媽咪由細到大都讚我係『虎鼻』有福氣，100%冇心虛答你哋，我一定唔會郁我個鼻，唔好再屈我！（好嬲？）點會嬲？我喺負面新聞下長大。」Shiga亦幫口指翠如不太貪靚。