許志安復工笑晒口：唔會忘記錯誤

許志安去年被爆背妻偷食黃心穎，之後他舉行記者會認錯，自嘲「我係一個壞咗嘅人」，之後就「潛水」14個月，至昨日才復工錄影ViuTV節目《Chill Club》。昨午4時許，他在司機接載下離開淺水灣寓所，直駛尖沙咀髮型屋，落車時被大批傳媒包圍，但他未有受訪，匆匆步入髮型屋，完事後上車前往九龍灣錄節目。

「係時候出嚟承擔」

晚上七時，許志安步出與在場傳媒見面，手戴婚戒、笑容滿面的他心情不俗，自行剖白心路歷程：「經過呢段時間沉澱、靜思、反省，覺得自己成長咗好多。今日係個好好嘅Timing出番嚟面對自己、社會同群眾。」又說：「呢件事令我更懂得去面對自己，係時候重新出發，做好自己。呢段時間，我用咗大部分嚟陪屋企人，因為覺得屋企係最重要，同埋好好裝備自己，深深咁樣諗吓自己未來日子應該點行，今日係時候出嚟承擔番自己講過嘅嘢，依家裝備好，就決定重新出發。」

受訪時，問到是否全面復出？安仔說：「自己唔敢講，疫情之下好多嘢唔到我去講同諗，我依家出嚟係想話畀大家知，我準備好，亦100%充滿信心，覺得會比以前做得更好。」事隔14個月再接受傳媒訪問，問到可有緊張到失眠？他說：「都有，太太都有同我講，出嚟工作要100%心態Ready好，內心要正面，出嚟要真心。其實呢年幾都有問自己係咪可以呢？出嚟見大家有少少緊張，不過就算緊張都要面對將來。」他提到太太時不禁眼濕濕，問到太太可有鼓勵說話？他說：「冇特別，佢叫我自然啲，同埋對自己有信心。」至於可有聯絡黃心穎？他說：「冇，以前嘅嘢已經過去咗，希望大家畀時間我，明白一時間未能接受，但我會每一步都做得好好。自己嘅錯誤、傷痕係唔會忘記，每次睇到都會警醒自己，要做好自己！」

盡力挽回事業

對於馬國明有新戀情，他表示：「有睇報道，佢嘅感情由佢自己講番。（今次復工，最想多謝邊個？）好多人需要多謝，朋友畀咗好多鼓勵同支持，仲有屋企人、太太，好多嘢喺心入面，之前Joey Tang（鄧建明）演唱會有叫我出嚟，但我未Ready好，所以婉拒咗。（會唔會開番之前開唔到嘅個唱？）完全未有打算。（會唔會做梁漢文演唱會嘉賓？）未被邀請，但開心事，有時間會去支持。」

問到可有新工作計劃？安仔說：「未知下一個工作係乜，之前都有同蘇永康去派口罩同埋探訪老人家。（希望挽回事業？）盡力，假以時日，希望大家見到。」他完成錄影後乘車返回淺水灣寓所。