黃宗澤余香凝私下冇聯絡
藝人黃宗澤（Bosco）自2012年與胡杏兒分手後，一直未有公開新戀情，即使3年前被指因拍劇而跟細12年的陳嘉桓（Rose）撻着，二人仍然否認。
「封殺」拒合作
傳蜜運中的Bosco依然愛玩，有指他於2018年底拍攝《飛虎之雷霆極戰》時，睇中余香凝並主動約會，但余香凝沒有理睬，還向Rose「告密」，令對方與Bosco吵大鑊！自此之後，Bosco見到余香凝即當透明兼面左左，並自行「封殺」對方，講明不會跟她一齊做訪問，以後亦不想再合作，實行有你冇我！
對於與余香凝交惡的傳聞，Bosco昨日回應：「我哋冇面左左，開工時一班人有講有笑，但私底下冇聯絡過。」余香凝亦同一口徑：「大部分劇集、電影出街，唔係傳不和就傳緋聞，我可以講係完全冇咁嘅事，不過我同Bosco對手戲唔多，私底下亦冇聯絡。」
Bosco的感情生活向來傳聞多多，早前有指他一腳踏兩船，正印女友其實是2015年合作內地劇《最好的我們》的張沙沙，女方近日來港宣示主權，Rose只好由Bosco的寓所搬往酒店居住。