楊埕不停試菜 暴肥20磅
曾代表香港出戰國際小姐的藝人楊埕，疫情下工作全面叫停，為求生計孤注一擲，轉型搞日式料理到會生意，由於不斷試菜，導致兩個月內體重暴增20磅，她苦惱地說：「我以前107磅，依家127磅，唔知點算！因為我同朋友開咗Omakase（由廚師發辦）到會服務，之前不停咁試菜，一個星期食幾次，食飯又要飲酒，要肥話咁易！雖然想減肥，但只係做運動唔夠，一定要食少啲，不過依家又做唔到，惟有每餐唔好食太多。」
勤滑水消脂
至於為何突然想到做上門料理，楊埕解釋：「新年前同朋友去日本搵到啲靚和牛同新鮮魚生，本來諗住喺內地開，因為疫情返唔到去，既然有原材料嘅渠道，就喺香港試咗先，依家生意都唔錯，好多朋友支持。」
急需減磅消脂的楊埕，坦言盡量多做運動，最近愛上滑水：「依家一得閒就會去游水同埋玩滑水，我仲係初學者，每次玩都搞到周身瘀晒，同埋第日起身手同腳都好痠痛，但我好鍾意玩，希望盡快減到肥。」