李日朗停工交人慳家煮飯仔

疫情令李日朗工作大受影響，回港後長時間留在家中。日前，他與樂基兒師妹、年輕13歲的模特兒女友黃靜藍外出拍拖，順道去街市買餸。兩人先去菜檔及魚檔入貨，之後再去燒臘店斬料，而且似乎是熟客仔，與店員寒暄幾句後成功講價。

一支飲品兩份飲

買完餸，他們就轉戰附近藥房買防疫用品和日用品，並精打細算地四圍格價。當日天氣酷熱，兩人行到身水身汗，順路走入便利店買飲料，一支飲品兩份飲，繼續慳家作風。

李日朗受訪時透露因疫情而回港小休，直言幕前收入大跌：「我諗大部分圈中工作者都遇到呢個情況，希望疫情快啲過去。（同女友玩煮飯仔慳錢？）之前放咗好多時間喺內地工作，大家見面時間唔多，點知疫情嚟到，反而促使大家多咗見面、多咗時間拍拖，咁咪玩吓煮飯仔囉！呢個疫情令到自己反思，係需要多啲時間陪身邊人。」

他表示這個空檔絕不可偷懶，要好好裝備自己，待一切回復正常後，就可以第一時間投入工作。