何泳芍扭轉觀念黑妹一樣靚
「美人魚」港姐何泳芍曾因皮膚黝黑受批評，不過仍無阻她入行的決心，望可改變人對美的單一定義：「由細個開始，身邊啲人對美嘅定義係好單一，好似皮膚白同身形瘦，從來唔會覺得我係靚女。直至去咗美國讀書，發現外國有唔同美，唔係只得瘦同白，其實我健康同有肌肉都係一種靚嘅定義，之後返到嚟香港就想改變大家對美嘅想法。」
何泳芍自信滿滿，然而小時候也曾因膚色而感到自卑：「因為連屋企人都會同我講點解咁黑，令到自己都唔認同自己，嗰時我好羨慕皮膚白嘅人，到大個就慢慢識得接受同明白乜嘢適合自己，好似我就比較啱行歐美style。」