霆鋒晒父子情唱出正能量
全面回歸樂壇的謝霆鋒，相隔一年推出廣東歌《善良》，由他親自作曲，填詞及編曲方面則由近年合作無間的喬星與陳子龍操刀。在新冠肺炎的陰霾下，整個社會充斥負面情緒，霆鋒欲借助新歌的正能量歌詞鼓勵人心，釋出善良，以歌聲為身邊人打氣。
「一路奉陪就是沒退避」
霆鋒將其內地美食節目《12道鋒味》及《鋒味》中的片段重新剪輯在新歌MV中，除有浸浴鏡頭外，還有一幕幕溫情場面，如他幫婆婆推紙皮車，又有他對住鴨子彈結他、抱起街頭流浪的貓咪及潛水落海底跟大海龜開心合照。至於最有愛的「彩蛋」，則是其父親謝賢的出現，兩仔爺齊逼地鐵，還有謝賢溺愛地摸住霆鋒的頭及搭住膊頭邁步前路，再加上深情歌詞如「支持你、保護你」、「一路奉陪就是沒退避」等，隔着mon都感受到暖暖愛意。
霆鋒深情說：「呢個世界冇可能每一天都係晴天或彩虹。愈係咁樣，愈能睇到，人係最善良。」同時他覺得人遇上挫折時不要自困，寄語打開心扉，自會發現總有個願意分擔及一直支持的人，會在傷心時伸手抹眼淚；不想說話時會靜靜地相伴；在失去信心時亦會作鼓勵。他續說：「世事無常，每一天都遇着無法想像嘅新挑戰，但仍然值得慶幸身邊有無條件支持你嘅嗰一位，或是情人，或是家人，或是朋友知己。」
