周柏豪戴口罩瞓耳仔出血！
最近全城防疫，歌手周柏豪為了家人亦不敢掉以輕心，為免聚餐連百日宴亦唔搞，更因有幾聲咳而戴住口罩睡覺一星期，以致耳背流血！
歌手周柏豪、菊梓喬（Hana）、吳若希與連詩雅（Shiga）等，昨日為抗疫歌《疫境同行》錄音，柏豪認為作為藝人在抗疫上應該多方位出錢出力：「之前見到停車場個姐姐口罩濕晒，我即時畀個新口罩佢用，有啲人唔夠防疫用品，但仍然為社會服務，覺得好心噏。」提到囡囡已三個月大，他坦言BB出世以來只出過一次街打針：「我都好擔心，因為冇嬰兒用嘅口罩畀佢。」
取消百日宴
而他亦十分注重個人衞生：「我要出去工作，有機會帶咗啲菌返屋企，我每次返屋企都會消毒鞋底、換衫、沖完涼先抱BB。我有少少咳，喺屋企都會戴口罩，試過戴住口罩一個禮拜瞓覺，戴到耳背流血。」柏豪坦言曾計劃搞百日宴，但已決定取消：「可能家人食餐飯，唔會打擾朋友，我拒絕聚餐。」
菊梓喬冇艷遇
至於連詩雅除工作外減少外出，每日都鑽研廚藝，但男友就冇口福：「得媽咪食過，我冇見過其他人，同男友好耐冇見。」而Hana則努力作曲，問是否想趁這段時間找個男友作調劑？她笑言足不出戶，難以結交異性，連詩雅即提議她透過交友App或旅行結識，Hana笑說：「我經常一個人去旅行，但都冇艷遇，可能因為冇化妝。」
