Aka操Fit Body搵男友胸肌當枕頭
組合Super Girls的Aka因做運動操得一副Fit爆身材，單身的她希望將來男友可以與她一起做運動，更希望男友會是一個「胸肌男」，可以保護她之餘，更可以讓她日日挨住睡覺！
組合Super Girls隊長Aka熱愛做運動，跑步、做Gym、跳舞都難不倒她，練得高挑纖瘦的好身材，又不時在社交平台大騷Fit爆身形。講到做運動，她坦言小學五年級已開始被老師選入田徑隊，中學是學界好手，自小又有跳芭蕾舞，故為人比較好動，直至長大就Keep住做Gym收身，她說：「可能有人會話我咁瘦，唔使收啦，但嗰種Firm係令人好舒服，會覺得自己輕咗。」她坦言現時操到有齊腹肌、馬甲線，勤力的她冬天亦會繼續操練：「因為我好驚之前嘅努力會冇咗，如果唔做Gym，我都會喺屋企張床做Sit Up嗰啲。」
「可能我會畀人呃！」
單身的Aka希望將來可以與男友一起做運動，談到擇偶條件，她希望兩人價值觀要一致，她不喜歡有夜生活、食煙飲酒及小器計較的男生，更重要是希望對方會有胸肌：「最緊要如果佢有胸肌，我挨落去就會好舒服，有安全感。（要好大隻？）又唔使好大隻。（有胸肌但有肚腩得唔得？）應該唔會啩，總之個人個身係要厚嘅，可以保護到我。」
問到到時會否日日摸男友的胸肌？她笑說：「我會日日挨個頭落去，畀我瞓一陣先，我唔講嘢住，一定勁舒服，我成日都會幻想，如果有就好啦，唔知我遇唔遇到呢？」問到現時望男生第一眼可會是有沒有胸肌？她說：「好似好鹹濕咁，但唔係嘅，我係望對眼先，因為由望你嘅眼神，唔多唔少都會Feel到佢係咪一個真誠嘅人，但可能我會畀人呃，哈哈！」
服裝：adidas