佘詩曼美女鼠賀年雙贏攻略

「視后」佘詩曼自前年內地劇《延禧攻略》後便紅到發紫,檔期爆到針都插唔入,保守估計身家已暴漲至二億幾,絕對是數一數二的圈中富婆,難怪她笑言睇見銀行存摺都心心眼!踏入鼠年大年初一,心情靚爆的阿佘化身美女老鼠應節,揚言希望今年工作及愛情一齊來,脫單成功!

佘詩曼年前事業再創高峰,劇集連帶商演、廣告代言等工作,財源滾滾,名利雙收,令本身已有可觀身家的她,數字繼續直線向上,於《延》劇效應下,保守估計其收入逾億,再加上名下幾個總值逾億的物業,其身家已暴漲至二億幾,認真令人羨慕!

去年大部分時間於內地拍劇的阿佘,難得新年放假返港鬆一鬆,為配合踏入鼠年的第一天,她悉心打扮穿上紅色貼身服飾晒弗爆身材,再於靚樣上「加工」化身美女老鼠,擺出不同可愛甫士向本報讀者拜年,祝願大家身體健康、事事順利!

睇住銀行簿就開心

談到去年事業成績,阿佘坦言的確唔錯,但尚有進步空間,寄望今年繼續努力,向全方位進發。對於有指她今年旺到爆,她聞言即開懷大笑說:「真係?咁我就會好開心,但都要做嘢嘅!(你舊年已經好好!)好好都要努力。(豬籠入水?)哎呀,我專注拍劇,拍兩部劇加埋70、80集,用好多時間,都開心,因為幾好發揮。(點獎勵自己?)冇時間獎勵,放喺銀行先。(你鍾意買『磚頭』喎!)冇睇行情,計劃都冇,但睇住銀行簿就開心。(好少時間見香港觀眾!)希望盡快同大家見面,TVB係有傾過,檔期唔啱啫!(過年後有咩工作?)最快3月先工作,所以非常珍惜喺香港嘅時間,會盡情吃喝玩樂同休息。(趁機約姊妹們出遊?)冇啦!全部都要湊小朋友。」

諗住生隊足球隊

貴為單身貴族,問到阿佘可渴望有愛情滋潤?她說:「希望啦!都冇咩所謂,工作、愛情、家庭、朋友,樣樣都好係好事,但邊有咁完美事發生,希望今年各方面會有更好成績。(唔係想行桃花運咩?)渴望唔到,因為唔係自己一個人嘅事,所以期待嘅。(都想脫單成功?)隨緣啦!」

基於身邊朋友也升任父母,問到阿佘可會憧憬結婚生仔?她不諱言以前很喜歡小朋友,亦想過將來會生很多個:「諗住生一隊足球隊出嚟就正嘞!但當見到啲姊妹好辛苦、好忙、好攰,又冇乜私人時間,要畀晒佢哋喎!不過係另一種樂趣,但我自己都享受依家呢種生活,可以想做咩就做咩,想去邊就去邊。(拍散拖?)唔好喇啩!唔好畀壓力自己同對方,隨緣,兩個人開心就得。(呢段時間工作先?)一直都冇話咩行先,有咩做咩,遇到好戲就拍,遇到好拖又拍。(呢幾年有冇?)唔話畀你知,哈哈!(畀人影到先認?)影到先算!」正過着單身生活的她揚言也享受做契媽:「都係(o架)!新年又嚟,派利是派到呢,但開心嘅,我都有成10個8個契仔契女。」

場地:Madame Fu Grand Cafe Chinois