菊梓喬工作狂搵「賢內助」脫單

冧莊「歌后」的菊梓喬(Hana)回顧2019年成績大感滿意,除了出碟、開處女演唱會外,更攞了大獎「最受歡迎女歌星」:「攞女歌手獎係surprise,亦係好大嘅推動力。(攞獎係肯定還是壓力?)我覺得好多嘢天安排係有原因,做呢行好多事發生係我哋控制唔到同估計唔到,但嚟到就要好好捉住。(再攞獎覺得係天意?)我會多謝天安排,最緊要做好本分。」

有價值先有人講

講到經常傳與同門的吳若希爭一姐不和,Hana笑說:「本身我哋冇乜嘢,我係幾唔八卦嘅人,我啲朋友成日覺得我好似唔係生活喺地球嘅人,我鍾意同諗嘅嘢比較奇怪。(所以同對方冇咁啱傾?)我又衰嘅,我少撩人傾偈,好多時候我都係因為工作先見到佢,而工作時我又淨係顧住工作。」問到新一年可會想遠離是非?她說:「呢行邊得(o架)?我諗通咗,如果你冇價值人哋連講都唔想講,開心大家畀呢個名份我,其實呢啲真係好小事,最緊要依家可以唱歌。」

每年她都會定下目標,去年中曾失聲的她希望新一年可以身體健康、寫多些歌、多些工作、開騷及出碟,問到愛情方面可會想拍拖?身為工作狂的她說:「我太foucs做嘢,就算真係巧合地識咗啲男仔都好難發展落去,邊有人會接受到事業心咁重嘅女朋友?除非我搵到一個掉番轉,我係男人角色,佢就做賢內助,咁我就可以開始一段感情,但真係要睇緣分。」她又笑言幸好拜年時親友從不會催她拍拖。

場地:Aga Florist by FaSunflower